工厂仔:默郡打吡拖肥靠得住
工厂仔:默郡打吡拖肥靠得住日期:2016-12-19 13:20:05

 

宿敌红军后防甩漏多

今轮英超压轴大战默西赛德郡打吡今晚上演,近况回勇嘅爱华顿会喺主场硬撼利物浦,论今季整体成绩,红军利物浦无疑胜过「拖肥」,不过打吡战胜负面子悠关,拖肥主场当然唔会轻易让路,何况佢哋上仗联赛主场反胜阿仙奴2比1,踢出今季代表作,红军防线甩甩漏漏,尤其门将成为最大致命伤,作客让波靠唔住,一于捧让球主胜。(Now 621及LeSports HK应用程式周二凌晨4时直播)

爱华顿对上一次赢出「默西赛德郡打吡」已经係2010年10月,之后喺各项赛事12次对利物浦,爱华顿只得7和5负,不过单计喺葛迪逊公园球场交手,爱华顿最近4次都同利物浦打成平手,踢落绝对唔输蚀。

爱华顿联赛主场不败

爱华顿早前一度陷入小低潮,10仗联赛只係赢过韦斯咸,其实佢哋今季主场联赛未输过,8战取得4胜4和,而且最近2仗分别喺先落后嘅情况下,以1比1逼和曼联及2比1反胜阿仙奴,士气、信心返晒嚟,今仗对住同市宿敌肯定打甩门牙带血吞!

利物浦继早前3比4不敌般尼茅夫之后,上次主场对韦斯咸亦仅仅逼和2比2,防线表现备受批评,其中门将卡利奥斯嘅表现更加成为战靶。上周中对米杜士堡,领队高普决定起用比利时门神米洛列特,虽然成功大胜3比0止血,但对手实力太弱,根本冇对红军防线构成太大威胁,而且米洛列特失去正选位置之前,表现亦唔见得稳阵,今场对手係由卢卡古率领嘅爱华顿锋线,相信红军后防将会面临极大考验。

而且自从巴西中场菲腊比古天奴受伤之后,红军进攻发挥一般,单靠奥历治喺前面冲锋陷阵好易被睇死,要让波真係拣唔落手。