法达斯维:米堡追打冇牙老虎
法达斯维:米堡追打冇牙老虎日期:2016-12-5 12:51:55

 

侯城搏到残一笃即散

今晚英超独脚戏上演护级大战,由第16位嘅米杜士堡主场硬撼尾2「老虎」侯城。侯城虽然啱啱喺英联盃杀入4强,但激战至射埋12码先赢波,耗力唔少,而且佢哋近4仗联赛作客全败,后防好似纸扎咁一笃即穿,米堡遇强都不落下风,今仗以逸待劳之下,对住呢隻「冇牙老虎」仲唔係抢分好时机,主胜有计。

(Now 621及LeSports HK应用程式周二凌晨4时直播)

侯城喺上周中英联盃8强恶斗纽卡素,法定时间前有箭头马保卡尼领红牌被逐,打埋加时双方打和1比1,最终「老虎」凭互射12码赢波晋级,係就係开心,但打少个兼激战120分钟,体力消耗极大,未必咁快回到气,况且佢哋伤兵满营,艾保靴南迪斯、赖恩美臣及马隆尼上阵成疑,而韦尔坚尼、基格卢亚、奥度巴祖及阿历斯布鲁士皆唔出得,搞到主帅费兰头都痕埋。最弊係侯城作客曳到冇朋友,单计近4仗联赛客场输晒之馀,仲狂失15粒,条防线犹如不设防,畀劲旅利物浦炒5比1还算情有可原,但连般尼茅夫都可以狂数佢哋六个一皮,实在非常肉酸。

尼格度重拾射门鞋

米堡虽然近5仗联赛仅1胜,睇落状态麻麻,但要留意,当中佢哋曾逼和李斯特城、阿仙奴及曼城,主场对「一哥」车路士只係仅输1球,非常硬淨,证明佢哋出战强队亦不落下风。米堡箭头尼格度上仗赛和李斯特城2比2之役亦梅开二度,呢位大旧中锋重拾射门鞋,绝对係米堡一大喜讯,况且米堡近4次主场对侯城,录得3胜1负明显格食格,加上上周中冇波踢,今仗可以抖到够,要赢体力输蚀兼天残地缺嘅「冇牙老虎」唔难,主胜不容错过。