英超:屈福特斗曼联吼半和
英超:屈福特斗曼联吼半和日期:2017-11-28 12:43:26
车期要识玩留放

今晚英超快车屈福特主场迎击曼联。莫连奴接掌曼联第2季,一洗「红魔」过去几季颓风,成绩尚算满意,但佢保守嘅踢法未改过,曼联近6次客战有4次同对手半场打和,快车档期更加唔慌会急住进攻,免得班兵踢残;屈福特喺主帅马高施华领军下踢出「烧鹅味道」,绝对有力守到半场,2.25倍半和抵玩!

红魔锋将哑晒火

莫连奴「泊大巴」用得肋就系人都知,不过要佢教班波踢进攻足球就考起佢,「寸王」近日仲因为咁畀人寸返转头,名宿简东拿就嫌曼联踢法唔好睇。曼联近期虽有伊巴谦莫域同保罗普巴齐齐复出,以为班波会转性踢出漂亮足球,点知事与愿违,上周六英超喺主场,只系靠对手一个乌龙波1比0仅胜新升班嘅白礼顿,表现唔出劲旅本色,再加埋前仗喺欧联0比1输畀巴素利,曼联已经连续两仗冇自己友入过波,攻力认真曳,前锋卢卡古近10场比赛入得1粒哑晒火,加上寸王深明快车档期留放之重要性,今晚对住屈福特唔似半场就嚟抢。

「大黄蜂」攻守兼备

「大黄蜂」屈福特上仗3比0完胜纽卡素,两连胜之馀更系一球不失,可谓攻守兼备。球队今季以3比3逼和利物浦同2比1赢阿仙奴堪称代表性,对住英超Big 6毫不怯场,今仗更有队长迪尼坐完波监复出,面对牌面佔优嘅红魔,肯定以稳守战术应战,领队马高施华属有料之人,半场要守住锋力疲乏嘅曼联唔难,半场和值博。