苏斯黑柴:德国喀麦隆捱细界
苏斯黑柴:德国喀麦隆捱细界日期:2017-6-25 18:28:00
勒夫试阵遇冇牙狮子

喺俄罗斯举行嘅洲际国家盃B组今晚上演最后一轮,德国会喺索契出战榜尾嘅喀麦隆,目前呢组4队都有出线机会,但今仗两军都唔将呢个赛事嘅胜负放喺第一位,大家都系為世盃做準备。德军领队勒夫钟意喺最后1轮分组赛试新人,喀麦隆前线哑火变「冇牙狮子」,黑柴推介2.1倍嘅中位数2.5/3球细盘。

德国「B队」暂时以4分排小组次席,不过呢班攞紧经验嘅二线兵演出只系一般,首轮对澳洲唔识留放,上半场搏完后,下半场好早就乾;次仗对智利就相反,上半场捱打错漏甚多,到下半场至愈踢愈稳。当然球队亦有得着,中场新星哥列斯卡同前线28岁新丁史甸度成功跑出,相信已经Book到明年俄罗斯世盃决赛周嘅一席位。

日耳曼新兵登场要适应

德军今次志在试兵,过去两场先后用过两位门将表现麻麻,今晚预期会畀机会巴黎圣日耳门嘅奇云查普试试,其餘未上过阵嘅「日耳曼」小将包括守将柏顿赫特、轩歷治斯及中场迪米亚巴尔等都有机落场,相信要时间适应,况且今场和波都出到线,冇需要急攻,睇定嚟食都唔迟。

喀麦隆由比利时65岁老帅晓高布斯领军,佢讲明喺世盃外围赛追赶尼日利亚先至紧要,今次参战洲际盃练兵為主,但头两轮赛事用死11名正选,就算换人都拖到完场前,明显想畀班球员培养默契。喀麦隆头两场演出守优於攻,由西维尔门将奥度亚领军嘅防线尚算硬净,但前线主力阿布巴卡就明显缺态,两仗零入球之外仲浪费大量机会,不过呢位比锡达斯射手被誉為「国家英雄」,估计晓高布斯都会继续畀机会佢,只系今仗面对世盃冠军,阿布巴卡想开斋难度更高,今场投注首选细盘。