欧冠:高普出招红军有计
欧冠:高普出招红军有计日期:2018-4-4 18:54:55
压迫踢法剋制曼城Tiki Taka

欧联8强首回合开战,今晚焦点非英超「红蓝内讧」莫属,由「红军」利物浦主场迎战「蓝月亮」曼城。曼城主帅哥迪奥拿倡导嘅「Tiki Taka」传控足球,今季英超所向披靡,不过面对擅于高压打法嘅利物浦领队高普,由德甲斗到英超都唔见优势,加上晏菲路球场一向系曼城「凶地」,今仗曼城仲要让波,当然捧红军让球主胜。

哥迪奥拿秉承恩师告鲁夫遗志,将「Tiki Taka」传控足球发扬光大,曼城最快今个星期就可以喺英超封王,实力可以话系超晒班。不过呢种坚持由后场层层推进嘅打法,绝对唔系全无弱点,面对擅长中前场採取高强度压迫嘅球队,「Tiki Taka」踢法往往会被剋制住,而今仗对手利物浦嘅领队高普,正系箇中高手。

近16次作客晏菲路不胜

事实上,蓝月亮今季联赛唯一败仗,就系1月作客以3比4不敌红军,而且无论执教多蒙特或利物浦,高普过去同哥迪奥拿12度交手,录得6胜1和5负嘅优势,系少数面对哥迪奥拿可以佔到甜头嘅领队。况且,曼城自03年5月喺晏菲路球场赢过利物浦后,之后近16次造访红军都未赢过,仅获5和11负不堪成绩,相当惨淡。

由「三叉戟」穆罕默德沙拿、罗拔图法明奴同沙迪奥文尼领衔嘅红军锋线,包办今届欧联10仗攻入34球之中嘅21球,协助红军拎到6胜4和不败佳绩,曼城忌惮利物浦锐利嘅快速反击,今仗未必敢轻举妄动,红军有地利兼获受让,让球主胜绝对值得支持。